ਪੰਜਾਬ ਵੋਟਰ ਸੂਚੀ ਵਿਵਾਦ: ਰਾਘਵ ਚੱਢਾ ਦਾ ਨਾਮ ਡਰਾਫਟ ਲਿਸਟ ’ਚੋਂ ਗਾਇਬ, ‘ਆਪ’ ’ਤੇ ਰਾਜਨੀਤਿਕ ਬਦਲਾਖੋਰੀ ਦੇ ਲਾਏ ਗੰਭੀਰ ਦੋਸ਼

ਪੰਜਾਬ ਦੀਆਂ ਵੋਟਰ ਸੂਚੀਆਂ ਦੇ ਚੱਲ ਰਹੇ ਸਪੈਸ਼ਲ ਇੰਟੈਂਸਿਵ ਰਿਵੀਜ਼ਨ (SIR) ਦੌਰਾਨ ਇੱਕ ਵੱਡਾ ਮਾਮਲਾ ਸਾਹਮਣੇ ਆਇਆ ਹੈ। ਰਾਜ ਸਭਾ ਮੈਂਬਰ ਰਾਘਵ ਚੱਢਾ ਦਾ ਨਾਮ ਡਰਾਫਟ ਵੋਟਰ ਸੂਚੀ ਵਿੱਚੋਂ ਹਟਾ ਦਿੱਤਾ ਗਿਆ ਹੈ ਅਤੇ ਉਨ੍ਹਾਂ ਦੇ ਨਾਮ ਅੱਗੇ 'ਸਥਾਈ ਤੌਰ 'ਤੇ ਸ਼ਿਫਟਡ' (Permanently Shifted) ਲਿਖਿਆ ਗਿਆ ਹੈ। ਹਾਲ ਹੀ ਵਿੱਚ ਆਮ ਆਦਮੀ ਪਾਰਟੀ ਛੱਡ ਕੇ ਭਾਜਪਾ ਵਿੱਚ ਸ਼ਾਮਲ ਹੋਏ ਚੱਢਾ ਨੇ ਇਸ ਪੂਰੀ ਕਾਰਵਾਈ ਨੂੰ ਰਾਜਨੀਤਿਕ ਬਦਲਾਖੋਰੀ ਕਰਾਰ ਦਿੱਤਾ ਹੈ।

ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਚੱਢਾ ਨੇ ਸਵਾਲ ਚੁੱਕਿਆ ਕਿ ਜਦੋਂ ਉਨ੍ਹਾਂ ਦੀ ਵੋਟ ਮੋਹਾਲੀ ਵਿੱਚ ਹੀ ਦਰਜ ਹੈ, ਤਾਂ ਫਿਰ ਉਨ੍ਹਾਂ ਨੂੰ 'ਸ਼ਿਫਟਡ' ਸ਼੍ਰੇਣੀ ਵਿੱਚ ਕਿਉਂ ਪਾਇਆ ਗਿਆ?

ਉਨ੍ਹਾਂ ਕਿਹਾ "ਇਹ ਕੋਈ ਆਮ ਦਫ਼ਤਰੀ ਗਲਤੀ ਨਹੀਂ ਹੈ। ਚੋਣ ਕਮਿਸ਼ਨ ਦੇ ਨਿਯਮਾਂ ਮੁਤਾਬਕ ਸੰਸਦ ਮੈਂਬਰਾਂ ਅਤੇ ਵਿਧਾਇਕਾਂ ਲਈ ਇੱਕ 'ਸੁਰੱਖਿਅਤ ਸੂਚੀ' (Protected List) ਹੁੰਦੀ ਹੈ। ਇਸ ਦੇ ਬਾਵਜੂਦ ਮੇਰਾ ਨਾਮ ਹਟਾਉਣਾ ਸਪੱਸ਼ਟ ਕਰਦਾ ਹੈ ਕਿ 'ਆਪ' ਸਰਕਾਰ ਗੁੱਸੇ ਵਿੱਚ ਇਹ ਸਭ ਕਰਵਾ ਰਹੀ ਹੈ। ਪੰਜਾਬ ਦੀ ਵੋਟਰ ਸੂਚੀ ਕਿਸੇ ਵੀ ਸਿਆਸੀ ਪਾਰਟੀ ਦੀ ਨਿੱਜੀ ਜਾਇਦਾਦ ਨਹੀਂ ਹੈ।"

ਰਾਘਵ ਚੱਢਾ ਦੀ ਵੋਟ ਪਹਿਲਾਂ ਦਿੱਲੀ ਵਿੱਚ ਸੀ। 2022 ਵਿੱਚ ਪੰਜਾਬ ਤੋਂ ਰਾਜ ਸਭਾ ਮੈਂਬਰ ਬਣਨ ਤੋਂ ਬਾਅਦ ਉਨ੍ਹਾਂ ਆਪਣੀ ਵੋਟ ਮੋਹਾਲੀ ਬਦਲਵਾਈ ਸੀ ਅਤੇ 2024 ਦੀਆਂ ਚੋਣਾਂ ਵਿੱਚ ਉੱਥੇ ਹੀ ਵੋਟ ਪਾਈ ਸੀ।

SIR ਦੀ ਕਾਰਵਾਈ: 13 ਅਗਸਤ ਨੂੰ ਜਾਰੀ ਡਰਾਫਟ ਲਿਸਟ ਵਿੱਚੋਂ ਪੰਜਾਬ ਦੇ ਲਗਭਗ 20.66 ਲੱਖ ਵੋਟਰਾਂ ਦੇ ਨਾਮ 'ਗੈਰਹਾਜ਼ਰ, ਸ਼ਿਫਟਡ, ਮ੍ਰਿਤਕ ਜਾਂ ਡੁਪਲੀਕੇਟ' ਦੱਸ ਕੇ ਹਟਾਏ ਗਏ ਹਨ।

ਸੁਧਾਰ ਦਾ ਮੌਕਾ: ਚੋਣ ਕਮਿਸ਼ਨ ਵੱਲੋਂ 13 ਅਗਸਤ ਤੋਂ 12 ਸਤੰਬਰ ਤੱਕ ਦਾਅਵੇ ਅਤੇ ਇਤਰਾਜ਼ ਦਰਜ ਕਰਵਾਉਣ ਦਾ ਸਮਾਂ ਦਿੱਤਾ ਗਿਆ ਹੈ।

ਚੱਢਾ ਨੇ ਸਾਫ਼ ਕੀਤਾ ਹੈ ਕਿ ਇਹ ਅਜੇ ਸਿਰਫ਼ ਇੱਕ ਡਰਾਫਟ ਸੂਚੀ ਹੈ, ਕੋਈ ਆਖਰੀ ਫੈਸਲਾ ਨਹੀਂ। ਉਹ ਨਿਯਮਾਂ ਮੁਤਾਬਕ ਆਪਣਾ ਨਾਮ ਦੁਬਾਰਾ ਦਰਜ ਕਰਵਾਉਣ ਲਈ ਕਾਰਵਾਈ ਕਰ ਰਹੇ ਹਨ। ਪੰਜਾਬ ਦੀ ਅੰਤਿਮ ਵੋਟਰ ਸੂਚੀ 12 ਅਕਤੂਬਰ, 2026 ਨੂੰ ਜਾਰੀ ਹੋਣੀ ਹੈ, ਜਿਸ ਤੋਂ ਪਹਿਲਾਂ ਉਨ੍ਹਾਂ ਕੋਲ ਆਪਣਾ ਨਾਮ ਵਾਪਸ ਸ਼ਾਮਲ ਕਰਵਾਉਣ ਦਾ ਪੂਰਾ ਮੌਕਾ ਹੈ।